August 7 aṭangin Agnipath scheme duh lohna campaign nei ṭan dawn

Loneitu pawl, Bhartiya Kisan Union (BKU) hruaitu Rakesh Tikait chuan sorkar laipuiin sipaia ṭang turte lak dan tur ruahmanna thar a siam, Agnipath scheme duh lohna lantirin August 7 hian loneitu pawl chuan campaign a nei ṭan dawn tih a sawi.

Uttar Pradesh-a Baghpat district-a loneitute intawhkhawmnaa thu a sawiah, Tikait chuan Angipath scheme duh lohna campaign kalpui a nih tur thu leh, August 7 aṭangin kar khat chhung an lantir dawn tih sawiin, an hmalakna hi loneitu pawl hrang hrangte pawh lo thlawp turin a sawm nghal bawk.

Tikait chuan tun hnaia sorkar laka lungawi lohna lantira nawrh huaihawt a nih hnuah, loneitu ṭhenkhat laka thubuai lo siam tawh, hun rei tak tak tawh amite haichhuah leh a nihthu a sawi. "Uttar Pradesh-a BJP sorkar a din khan, BJP member thubuai neite chu titawp sak an ni," tiin loneitute thubuai siamsak tawhte chu tihtawp sak an nih ve loh chuan sorkar laka lungawi lohna an lantir dawn tih a sawi bawk a ni.

Punjab-a loneitu pawl, Samyukt Kisan Morcha (SKM) pawhin August 16 hian state pumah Agnipath scheme duh lohna lantir an tum a, hemi ni hian district thuneitute hnenah memorandum an thehlut dawn tih an sawi.