Association for Democratic Reforms (ADR) leh National Election Watch (NEW) in zirchianna an neihah, kum nga liam ta chhungin state leh general election neih hrang hranga vote thlaktu zingah, candidate zinga duh nei loa None of the Above (NOTA)-a thlak mi vaibelchhe 1.29 an awm. 
ADR leh NEW chuan kum 2018-2022 inkara inthlan neihna hrang hranga vote tlate zirchiangin, hemi chhung hian state assembly inthlanah NOTA-ah hian vote 64,53,652 a tla a ni. 
Report chuan kum nga chhunga inthlan neihna hoah NOTA vote hmuh zat hi vote tla aṭangin 1.06% a tling pha a ni. Hemi chhunga Parliament inthlanpui huam tela NOTA-in vote a hmuh zat hi 65,23,975 a tling a, NOTA vote hmuh tamna ber chu Bihar-a Gopalganj (SC) constituency-ah niin vote 51,660 a hmu pha. Hetih lai hian NOTA vote hmuh tlemna ber chu Lakshadweep-ah niin vote 100 a hmu. 
State assembly inthlan neihna zingah, kum 2020-a state pahnih inthlanah NOTA hian vote 7,49,360 a hmu a, vote tla aṭangin 1.46% a tling. Bihar-ah vote 7,06,252 leh NCT Delhi-ah vote 43,108 a hmu a ni. 
Kum 2022-a state panga assembly inthlanah NOTA vote hmuh zat a hniam ber thung, heng state pangaa a vote hmuh hi 8,15,430 niin vote tla aṭangin 0.70% a ni. Goa-ah vote 10,629, Manipur-ah 10,349, Punjab-ah 1,10,308, Uttar Pradesh-ah 6,37,304 leh Uttarakhand-ah 46,840 a hmu.
Kum 2019-a Maharashtra assembly inthlanah NOTA-ah hian vote 7,42,134 a tla a, kum 2018-a Mizoram assembly inthlanah vote 2,917 a tla thung. 2018-a Chhattisgarh assembly inthlanah NOTA hian vote tla aṭanign 1.98 % a hmu phak a ni. 
Kum nga chhunga state assembly inthlana NOTA vote hmuh tlemna chu kum 2018-a Mizoram state assembly inthlan leh, kum 2020-a Delhi state assembly inthlanah niin, NOTA vote hmuh hi vote tla aṭanga 0.46% an ni. 
Kum 2018 aṭang khan state assembly inthlan neihah, constituency pakhata criminal case nei candidate pathum emaw a aia tam emaw awmna, Red Alert Constituency-ah NOTA-ah hian vote 26,77,616 zet a tla tawh niin ADR chuan a sawi. 
ADR chuan inthlan neihna bialah, candidate-te aia NOTA in vote a hmuh tam zawk chuan candidate zinga vote hmu tam ber chu chaka puang loin, inthlan ṭhat buatsaih zawk tur leh, candidate ngaite chu an chuh nawn phalsak lo turin a rawt bawk a ni.