GJM hruaitu leh a nupui tualthah thubuai siamsak

Gorkhaland state hran ngiata nawrh huaihawt mek, Gorkha Janmukti Morcha (GJM) hotu Bimal Gurung leh a nupui Asha chu Ninga­ni khan West Bengal sorkar­in tualthah thubuai a siamsak.

GJM te nawrh huaihawt vang­a kar kalta Inrinni-a tharum thawhna thlenga mi pakhat a thih chungchangah state sorkar chuan GJM hotu leh a nupui hi tualthah thubuai a siamsak a ni.

State sorkar hian Ningani khan Darjeeling-a nawrh huaihawt mek chungchang thlir­in all-party meeting a ko a, mahse he meeting-ah hian GJM leh hills area-a political party dangte an tel lo. Congress, CPM leh BJP pawh an tel lo a ni.

Police official chuan June 17-a nawrh huaihawtten tharum thawhna thleng a, motor te hala police te an beih chungchangah Gurung leh a nupui Asha chu mawhphurtuah puh an nih thu a sawi. Hemi nia GJM activist leh police te inkara buaina chhuak vang hian mi pakhat a thi a, security force 35 ten hliam an tuar a ni.

Gurung leh a nupui chuan police-te hian dik lo takin an puh niin an sawi thung a, Gurung chuan, “Kan mi leh sa pathum an thi a, chuti chung chuan kan lakah thubuai an siam a ni. Police leh state sorkar te hian human rights an palzut a, mipuite thihna an thlentir avangin thubuai ziah­luh zawk tur a ni”, a ti.

GJM hian state hran phuta nawrh huaihawt chu an la kalpui chhunzawm zel a, Darjeeling-a security force tirh luhte chu koh let an nih hma chuan tiam chin awm loin an nuar zel dawn tih an sawi. State sorkar chuan buaina punlun zel tur venna kawng khat atan ni li chhung Darjeeling area-ah hian internet a titawp tawh bawk.