President thlanah Meira Kumar-in a chuh dawn

Rorel lai, NDA in President thlanna neih turah official candidate atan Ram Nath Kovind a puang a, hemi hnu hian eptu party ṭangrualte chuan Lok Sabha Speaker hlui leh Congress party hruaitu hlun Meira Kumar-i chu eptu pawl candidate turin an puang ve leh.

Eptu party 17-te chuan Meira Kumar-i hi joint candidate atan an pawm a ni. Kumar-i leh Kovind-a te hi Dalit hnam ve ve an ni.

Meira Kumar-i hi kum 72 mi niin, term nga a MP tawh. Deputy Prime Minister hlui leh Dalit hruaitu lar Babu Jagjivan-a fanu a ni a, Bihar lam mi a ni. Kumar-i chuan eptu ṭangrualten joint candidate atana an thlanna chu a pawm thu sawiin, electorate hnenah ram tana ṭha tur ngaihtuaha vote thlak turin a sawm.