Delhi Police-ten Rahul Gandhi leh Priyanka Gandhi Vadra hreng

Eptu party, Congress chuan nimin khan ram chhunga thil man sang zel, unemployment rate sang leh nitin khawsakna atana mamawh GST rate tihsan a nih chungchangah lungawi lohna an lantir.

Lungawi lohna lantirnaa tel zinga party hruaitu, Rahul Gandhi leh Priyanka Gandhi Vadra-te chu Delhi police-ten an hreng zui a ni. Anni bakah party MP eng emaw zat hren tel an ni bawk a, an zingah hian party hruaitu hlun Shashi Tharoor pawh a tel.

Priyanka hi Delhi-a AICC headquarters kawtah lungawi lohna lantira sit-in protest neihnaah a tel a, party headquarters kawtah hian Delhi police-te chuan daidanna an siam a ni. Daidanna siam hi Priyanka chuan a kaltlang a, police-te chuan motor-ah nawr lutin an hruai sawn a, an hreng zui nghal a ni.

Nimina Parliament rorel inkhawmah pawh party hruaitu Sonia Gandhi leh Rahul Gandhi hoin, Congress MP-te chuan thil man sang leh unemployment rate sang zel duh lohna lantirin thawmhnaw dum an inbel bawk a ni. Rajya Sabha-ah chuan BJP kaihhruai sorkar laipui chu central agency-te dik lo taka hmanga puh Congress member-te an aubuai avangin rorel inkhawm tihtawp a ni.

Parliament Complex-ah Congress MP-te hian lungawi lohna hi lantirin, Rashtrapati Bhawan panin kawng an zawh zui bawk. Kawng zawhnaah hian Sonia Gandhi erawh a tel ve lo. Delhi Police-te chuan Congress MP kawngzawhte hi lo dangin, Vijay Chowk-ah Rahul Gandhi leh hruaitu dang ṭhenkhatte chu manin, bus-in an hruai sawn nghal bawk.

Vijay Chowk-a police-ten an lo dan hian, Rahul Gandhi chuan thil man sang zel chungchang sawichhuah an tum mai tih sawiin, democracy chu tihhlumin a awm mek niin a sawi. An party MP ṭhenkhat chu police-ten kut an thlak niin a sawi bawk a ni.

Party hruaitu Jairam Ramesh chuan, "Vawiina Congress MP-ten democratic right an neih anga thil man sang, unemployment leh GST chungchanga lungawi lohna lantir an tum chu dan beh an ni leh ta," tiin a twitter-ah a ziak.