CJI NV Ramana-a'n amah thlaktu atan Justice UU Lalit a rawt

Chief Justice of India (CJI) NV Ramana chuan August 26-a a term a tawp huna amah thlaktu atan Justice Uday Umesh Lalit a rawt.

Ministry of law and justice-in a thlaktu tur rawt tura a hrilh hnuah, CJI hian Ningani khan Jutice Lalit a recommond-a lehkha a thehlut a ni. Kum 2021, April 24-a CJI 48-na atana lakluh, CJI Ramana hian SA Bobde a thlak a, thla 16 chuang he hna hi a thawh hnuah August 26 hian a chawl tawh dawn a ni.

High Judiciary-a judge-te ruat dan tur, Memorandum of Procedure (MoP)-a tarlan angin, CJI kalchhuak tur hian Law Ministry aṭanga hriattirna a dawn hnuah amah thlaktu tur hi a ruat thei a ni. Tihdan phung angin, CJI hian a thlaktu tur atan hian Supreme Court-a judge senior ber a ruat ṭhin. A rawtna hi Law Ministry hnenah thehlutin, Law Miniser hian Prime Minister hnenah a pe ve leh a, PM thurawn angin President chuan a lo tifel ṭhin.

Justice Lalit hi kum 2014, August 14 khan Supreme Court judge atan ruat a ni a, hemi hma hian Central Bureau of Investigation (CBI)-ah special public prosecutor-in a awm. Bombay High Court-ah kum 1983, June aṭanga 1985, December thleng khan a lo thawk tawh bawk.