Parliament Building thar sak hna 70% zo tawh

Central Vista Development and Redevelopment Plan (CVDRP) hnuaia Parliament building thar sak hna thawh mek chu 70% zawh a ni tawh a, November thlaah building hi zawh fel a ni dawn tih minister of state for urban affairs and housing Kaushal Kishor chuan a sawi.

Minister hian Ningania Lok Sabha-a ziaka zawhna a chhannaah hei hi a sawi a ni.CVDRP hnuaiah hian sorkar laipuia urban affairs and housing department chuan project panga a thawk a ni.

Common Central Secretariat Building 1, 2 leh 3-ah hna hi 17% zawh ni tawhin, nakkum December-ah a vaiin zawh fel a ni dawn tih Minister chuan a sawi bawk.

Vice President enclave pawh 24% sak zawh a ni tawh a, nakkum January thlaah zawh fel a ni ang.

Kaushal Kishor chuan Directorate of Estates (DoE) chuan general pool office-ah minsitry leh department hrang hrang tan office hmun a pek thu sawiin, ministry leh department 69 tan ram square feet nuai 11.98 a pe a ni. Heng department hrang hrangten office an luah man hi kum khatah Rs vbc nuai 1.17 a tling a, Central Vista project thawh zawh a nih hunah chuan ministry leh department-te hian sum tam tak an hum thei dawn a ni.

Central Vista Redevelopment Projects atan hian budget, Rs vbc 14,450 ruahman a ni a, kum 2026-ah project hi zawhfel tura tih a ni. He project-ah hian Prime Minister vengtu, Special Protection Group (SPG) building sakna tur pawh telh a ni.

Parliament Building thar sakna tur lungphum hi kum 2020, December 20 khan prime minister Narendra Modi chuan a phum a ni. Rajya Sabha hall tharah hian seat 384 a awm dawn a, Lok Sabha hall-ah seat 770 awmin, joint session neihna tur seat 1,134 awmna siam a ni bawk ang.