Darjeeling-ah ei leh in lamah harsatna thleng ṭan

Gorkha Janmukti Morch (GJM) ten West Bengal aṭanga Gorkhaland state hran ngiata hun rei tak Darjeeling-a nawrh an huaihawt tawh vangin he khawpuia chengten ei leh in lamah harsatna an tawk ṭan niin West Bengal Food and Supplies Minister Jyotipriyo Mallick chuan a sawi.

Minister Mallick chuan GJM hian ni 10 zet nawrh huaihawt tawhin, hill area chhungah ei tur phur truck pawh tlan luh an phal lo a, a, hei vang hian ei tur an tla­chham ṭan tawh a ni, a ti. Buhfai, wheat leh nitin khawsakna atan mamawh dangte pawh phurh luh phalsak an nih loh avangin Darjeeling hills-a public distribution system chu a chhe tawh a, PDS dawrte pawh an hawn phalsak an ni lo bawk niin a sawi.

Darjeeling, Kurseong leh Kalimpong-ah hian PDS dawr 670 vel an awm a, mahse hengte hi khartir vek an ni a, mi tam tak PDS dawr aṭanga chaw lam chi an lakah in­nghat an awm vangin mipuite dinhmun chu a chhe sawt hle a ni, a ti. Minister chuan GJM hotu Bimal Gurung chuan hills area aṭangin Gorkha National Liberation Front (GNLF) hotu Subhas Ghising chu alo um chhuak tawh a, mahse tunah chuan ei leh in lamah harsatna thleng vangin mipuite chuan Gurung pawh chu an la um chhuak ve leh dawn a ni, a ti.