Ram pathum tlawh turin PM a zin chhuak
Prime Minister Narendra Modi chu ni li thanga ram pathum, Portugal, US leh Netherlands tlawh turin Inrinni khan a zin chhuak a, vawiin hian US President Donald Trump nen meeting an nei ang.
PM hian Portugal tlawh hmasa berin Portugal Prime Minister Antonio Costa nen an inhmu a, ram pahnihte inlaichinna chungchangte sawiin thawhdunna tur thuthlung eng emaw zat an ziak nghal a ni. Ram pahnihten thawhdunna tur inremna 11 an ziahah hian science and technology, education, anti-terrorism leh climate lama thawhdunna tur pawh a tel.
Ram hruaitu pahnihte chuan inremna thuthlung an ziahfel hnu hian joint press conference an nei nghal a, Modi leh Costa te chuan ram pahnihte hian thla ruk kalta chhungin inzawmna nghet leh ṭha zawk an neih chhoh thu an sawi.
Modi hian nimin khan Portugal aṭangin US a pan a, vawiin chawhnu lamah White House-a US President Donald trump nen an inhmu ang. Hruaitu pahnihte hi darkar nga vel an inkawm dawn a, defence chungchang bakah economy lama inzawmna ṭha zawk siam dan te, firfiakte chetna beihlet chungchang leh security lama thawhdunna te an sawi ang. An inkawm zawh hnuah PM Modi leh President Trump-te hian thuchhuah inṭawm an siam nghal dawn a, press meet erawh an nei lo ang.
June 27-ah PM hian Netherlands a pan dawn a, Dutch Prime Minister Mark Rutte nen meeting neiin, Dutch lal King Willem-Alexander leh Queen Maxima-te pawh a hmu dawn a ni. India leh Netherlands tan kumin hi palai an intirh tawn kum 70 na tlin kum a ni.