India Vice President thar Jagdeep Dhankhar

India Vice President 14-na atan West Bengal governor hlui Jagdeep Dhankar chu Inrinni khan thlan tlin a ni.

BJP kaihhruai National Democratic Alliance (NDA) candidate Jagdeep Dhankar hian eptu pawl joint candidate, Margaret Alva chu vote 346-in a hneh a ni.

Jagdeep Dhankar hian vote 528 hmuin, a vote hmuh hi vote tla aṭangin 72% a tling. Margaret Alva hian vote 182 a hmu. Kum 1997 hnua Vice President thlanna ṭum ruk neih tawha inhnehna sang ber a ni.

Kum 71 mi, Jagdeep Dhankar hi BJP-in Sangh Parivar aṭanga politics bul ṭan ni lo, VP candidate atana a ruat hmasa ber a ni. Bharon Singh Shekhawat hnua Rajasthan state aṭanga Vice President ni hmasa ber a ni bawk.

Rajasthan thingtlang khuaa piang leh seilian, Jagdeep Dhankar hi Rajasthan-a lawyer ṭha ber zingah a tel pha a, Rajasthan High Court leh Supreme Court-ahte pawh lo thawk tawhin, Rajasthan High Court Bar Association hruaitu a ni tawh bawk a ni.

Kum 1989-ah politics-ah lutin, hemi kum hian Rajasthan-a Jhunjhunu bial aṭangin Lok Sabha member-ah thlan a ni. Chandra Sekhar kaihhruai Janata Dal sorkarah minister of state for Parliamentary Affairs a ni tawh a, kum 2019 khan West Bengal Gorvernor-ah dah a ni.