India flag manah Railways-a thawkte hlawh Rs 38 zel lak tum

India Railways chuan 'Har Ghar Tiranga' campaign-na hnuaia hnathawktute hnenah India flag an semna man chu hnathawktute hlawh aṭangin flag pakhat manah Rs 38 zel lak a tum. Hei hi railways-a thawkte chuan nasa takin an dodal thung.

India flag hi railways-a thawkte hnenah private agency chuan a sem dawn a, flag pakhat man hi Rs 38 tih a ni. Hnathawkte hian flag man hi sum faiin an pe lo ang a, mahse an hlawh aṭangin lak a ni dawn thung a ni.

Mahse North Central Railway Employees Union chuan he thil hi an duh loh thu an sawi.

BJP kaihhruai NDA sorkar chuan kumina India Independence Day vawi 75-na lawmna puala peng pakhatah chhungkaw tinte chu an inah India hnam puanzar zar tura ngenin, 'Har Ghar Tiranga' campaign a kalpui mek a ni. Heng flag-te hi BJP office-ah Rs 20-a lei theih niin, head post office aṭangin Rs 25-a lei theih a ni bawk. Hmun hrang hrangah self-help group chuan Rs 20 in an zuar bawk.

Ram chhunga post office zawng zawng chuan flag hralhchhuah leh thawnchhuah chhunzawm zel theihna turin August 15 hma chu holiday-ah pawh office an hawng dawn tih Ministry of Communication chuan a sawi.