Delhi leh state dang 6-te Covid test leh vaccine pek ngai pawimawh turin hrilh

Sorkar laipui chuan Delhi leh state dang parukte chu Covid-19 hri kai an pun chhoh leh avangin hri darh tur venna atan test neih ṭhat leh, vaccine pek chhuah chu ngai pawimawh turin a hrilh.

Delhi, Kerala, Karnataka, Odisha, Tamil Nadu leh Telangana hnenah lehkha a thawnah, union health secretary Rajesh Bhushan chuan festival lo awm turte leh, pungkhawmna hrang hrang awmte chuan hri leng hrang hrang, a bikin Covid hri chu a tidarh leh thei a ni, a ti. Heng state-te hian an state-a hri kai punna district bikte chu uluk taka an thlithlai a, hri darh tur venna kawngah hma an lak ṭhat a ngaih thu a hrilh a ni.

Thla hmasa aṭang khan Delhi-ah hian hri kai hi an pung chho leh a, ni khatah hri kai hmuh chhuah hi chawhrualin mi 811 vel an tling a ni. Maharashtra-ah pawh district panga-ah kar liam ta chhunga hri kai hmuhchhuah, weekly positivity rate chu 10% chung lam a ni leh tawh a, district dang 13-ah pawh hri kai hi an pung bawk. Kerala-ah chuan chawh rualin ni khatah hri kai thar mi 2347 awm ang an ni a; Tamil Nadu, Karnataka, Odisha leh Telangana-ah pawh ni khatah hri kai thar hi an pung chho hle.