Covid-19 kai maktaduai chuang an awm tawh

India ramah Covid-19 hripui lengin zual lam a pan zel a, Ministry of Health and Family Welfare chuan nimina report an tihchhuahah hri kai hmuh chhuah thar 34,956 an awm tih tarlangin nimin thleng khan ramchhung hmun hrang hrangah hripui kai mi 10,03,832 an awm tawh. Nimina hri kai hmuh chhuah thar zat hi ni khata hmuh chhuah thar tam ber ni a ni leh.

MoHFW-in nimina report an tihchhuah hma darkar 24 chhungin Covid-19 kai dama puan 22,942 an awm a, ram chhung hmun hrang hrangah enkawl dam 6,35,757 lai an awm tawh a, hri kai mek 3,42,473 an awm bawk. Enkawl dam tawh rate hi  63.33% a ni a, thihpui 687 lai awm leh bawkin nimin thleng khan mi 25,602-in an thihpui tawh.

Indian Council of Medical Research (ICMR) chuan nimina report an tihchhuahah darkar 24 chhungin sample 3,33,228 an test hman a, hei pawh hi ni khatah Covid-19 sample an test tam ber a ni leh bawk. Hri len ṭan aṭanga nimin thleng khan ICMR hian sample 1,30,72,718 an test tawh a ni. ICMR hian laboratory pawmpui 1,244 a nei tawh a, heng zinga 880 hi sorkar laboratory niin 364 chu private laboratory a ni thung.

Congress hruaitu Rahul Gandhi chuan sorkar laipuiin hri kai darh zel tur venna kawnga nasa zawka hma a la lo anih chuan,August 10-ah ram chhunga hri kai hmuh zat chu maktaduai  hnih a tlin chhoh theih a rin thu a sawi. 

Rahul Gandhi hian hri leng dona kawnga sorkar  hma lakna chu a lo sawisel fo tawh a, awmze mumal leh ruahmanna fel tak neia hma lak a ṭul a ni, a ti. Gandhi hian Thawhlehni khan tunkar chhungin hri kai zat hian maktaduai khat an tling dawn niin a twitter a lo ziak tawh a ni.