PM Modi-a'n US Tech CEO-te kawm

US-a cham mek, Prime Minister Narendra Modi chuan Pathianni khan American firm lian 20-a an Chief Executive Officer (CEO)-te a hmu a, India rama investment ti turin a sawm.

PM-in sumdawng hotu a kawm zingah hian Apple hotu Tim Cook, Google hotu Sunder Pichai, Ciso hotu John Chambers leh Amazon hotu Jess Bezos-te pawh an tel. Thla thar aṭanga GST hman ṭan tur chungchangte sawi chhuakin, PM chuan India ram chu sumdawnna hmun ṭha a ni, a ti.

Kum thum kalta chhung khan NDA sorkar policy avangin Foreign Direct Investment (FD) tam tak hip luh a nih thu PM chuan a sawi a, a kaihhruai sorkarin ram siamṭhatna tura hma a lak dan kawng hrang hrangte a sawilang bawk. PM leh CEO-te hi minute 90 chhung an meeting a ni. CEO-te hian sorkar laipuiin ‘Make in India’, ‘Digital India’, ‘Start Up India’ policy a kalpui mek leh a flagship programme dangte pawh ṭha an tih thu leh an thlawp thu an sawi ve bawk.

Pathianni vek han PM Modi hian Virginia-a Indian-American-te hmaah thu a sawi a, he hunah hian tel an ṭhahnem hle. Modi chuan sipaiten Pakistan-a fir­fiakte hmun bei tura surgical strike an neih chungchangte a sawichhuak a, he surgical strike kalpui chungchangah hian khawvel ramten zawhna engmah an nei lo a ni, a ti. Surgical strike neih hian India chuan a ram humhim tur leh a himna turin a bei thei a, chakna a neih a ni tih a lantir tih a sawi. A kaihhruai sorkar hnuaiah chuan eiruk vanga hmingchhiatna engmah a awm loh thu a sawi bawk.

India chuan chak takin hma a sawn mek a, he hmasawnna thlen tur hian India mi tinte chuan tha thawh an duh a ni tiin PM chuan a sawi bawk.