President poll : Kovind-a’n UP MP leh MLA te a hmu

President thlanna neih tura NDA candidate, Ram Nath Kovind chuan political party hrang hrangte thlawpna hmuh tumin campaing-in a zin chhuak ṭan a, Pathian­ni khan Lucknow-ah Uttar Pradesh-a BJP leh a thawhpui MP leh MLA-te a hmu.

Kovind hi Union minister Nitin Gadkari leh BJP National General Secretary Bhupendra Yadav-te’n an ṭawiawm a, Chief Miniter Yogi Adityanath-a official residence-ah MP leh MLA-te nen hian inkawmna hun an nei a ni.

NDA president candidate hian state hrang hrang tlawhin, electoral college member-te hmuh kual a tum a, a zin kualnaah hian union minister bakah BJP senior leader leh MP pahnihten an ṭawiawm zel dawn niin BJP chuan an sawi. Kovind hi electoral college vote 62% vel hmu tura rin a nih avang­in president thlannaah hian tling tur chiangah ngaih a ni.

BJP leh NDA hnuaia a thawhpui, TRS, YSRCP, AIADMK, BJD leh JD(U)-te chuan Kovind hi an thlawp tur thu an sawi tawh. President atana thlan tlin a nih chuan KR Nawryanan hnua Dalit hnam zinga president dinhmun luah leh thei hmasa ber a ni ang.

Hetih lai hian Congress kaihhruai eptu pawl ṭangrual­te chuan Kovind-a khing tur hian president candidate inṭawm atan Lok Sabha speaker hlui Meira Kumar-i chu an ruat ve bawk. Congress high command chuan Pa­thianni khan Karnataka Chief Minister Siddaramaiah chu Kumar-i’n nomination paper a thehluh huna proposer ni turin an thlang.

Janata Dal (S) chuan Karnataka Legislative Coun­cil Chairman DH Shan­ka­ramuthry laka non-confi­dence motion put luhah BJP an thlawp hnuin, president thlanna neih turah hian Congress kaihhruai eptuṭangrual pawl candidate an thlawp dawn tih an sawi. JD(S) hian MLA 40 leh MP 2 an nei a ni. President thar tur hi July 17 hian thlan a ni dawn a, vote tla te chu July 20-ah chhiar a ni ang.