Srinagar-ah buaina chhuak thar leh

Nimin khan Jammu and Kashmir hmun hrang hrangah tharum thawhna a thleng leh a, state khawpui Srinagar-ah pawh buaina chhuak avang hian mi 10-in hliam an tuar.

Srinagar khaw chuan hnuai lam, Eidgah-ah police leh mipuite an intibuai. Eidgah hmunah hian Eid puala ṭawngṭaina neihna turin sorkar chuan khuahkhirhna a siam a, mahse nimin zing khan tualchhung mite chu he hmunah hian pungkhawmin police-te chuan a hnawhdarh nan tear gas an hman a ngai a ni. Mipui pungkhawmte chuan lungin police-te hi an tawng zui a ni.

Kashmir chhim lam Anantnag khuaah pawh darkar khat chuang zet security force leh mipui pungkhawmte an intibuai bawk. Eid puala ṭawngṭaina hun hman zawh anih hnuin mipuite chuan Janglat Mandi chu lawngin an tawng a ni. Sopre leh Baramulla district-a Pattan khuaah buaina a chhuak bawk.

Kar kalta khan mipui pungkhawmte chuan Srinagar-a Jama Masjid pawnah deputy SP Mohammad Ayub Pandith chu an lo sawisa hlum tawh bawk. He officer hi mosque pawn lama duty niin, amah chauh­a a awm laiin mipui­ten an khawih rawn a ni.

Jammu and Kashmir Chief Minister Mehboob Mufti-i chuan deputy SP chunga thil thleng chu pawi a tiin zahthlak a tih thu a sawi a, police-te chuan dawhthei takin mipui lungawi lote chu an mi leh sa ang maiin an enkawl ṭhin a, mahse hetianga beih an tawh fo chuan an dawhthei loh chin a thlen a hlauhawm thu leh, hetiang hun a thleng a nih chuan thil awm dan a khirh tawh hle tur thu a sawi. Police officer sawisak hlum a nih vang hian J&K Police chuan an mi leh sate chu Eid ṭawngṭaina hmunahte awm lo turin an lo inchah tawh a ni.