Rajnath Singh-a'n Leh a tlawh

Defence minister Rajnath Singh chuan nimin khan ramria sipaite dinhmun leh ramri venhim kawnga sipai hmalakna te enfiah turin Leh a tlawh a, chief of defence staff Gen Bipin Rawat leh army chief Gen M M Naravane ten an ṭawiawm. 

Leh-a Stakna leh Lukung chu Singh chuan a tlawh a, sipai hmanrua te pawh a en nghal bawk a ni. Singh hi July 3 kha Leh-a a zin tum tak zawk  a ni a, mahse hemi ṭum hian prime minister Narendra Modi chu sawi lawk awm loin a zin zawk a ni.

India leh China hi ramri chungchang inti thiam loin, June 15 khan ram pahnihte sipai hi an lo insual buai tawh hial a ni. Hei vang hian India chuan ramriah sipai a dalh belh bakah indo a thlen palh thulhah ralthuamte a chhawp hnai a, ramri dinhmun enfiah tur hian Modi leh Singh-te hi an kal ta ni.

Tunah hian India leh China sipaite chu ramri hrulah an tawlh kir ve zel niin media ṭhenkhatte chuan an tarlang a, an inepna pawh a hma ai chuan a ziaawm tawh niin an sawi bawk. Mahse fimkhur thu hlaah India sipaite hi an inralring reng tho a ni.