Lok Sabha-ah freedom fighter leh martar-te zahna hlan

Quit India movement champha vawi 80-na pualin, nimina Lok Sabha inkhawmah India ram zalenna sualtu leh martarte zahna hlanna hun hman a ni.

Rorel inkhawm ṭan a nih veleh, speaker Om Birla chuan kum 80 liamtaa Mahatma Gandhi-an Quit India movement a kalpui ṭan dan te, hemi kal zel avanga kum 1947, August 15-a India ramin zalenna a hmuh theih tak thute a sawichhuak. Quit India movement chu India ramin zalenna a hmuhna atana a bul ṭanna pawimawh a ni, a ti.

India ram zalenna tur sual laia ram tana beitute leh, martarte zahna an hlan thu sawiin, Speaker chuan an inpekna hian midangte ram tana theihtawp chhuah turin a tiphur a ni, tiin a sawi.

Rajya Sabha-ah chairman kalchhuak tur Naidu thlah
Nimina Rajya Sabha inkhawma chuan House chairman leh Vice President kalchhuak tur, M Venkaiah Naidu thlah a ni a, Vice President a nihna anga a thusawi hnuhnung ber pawh a nei nghal a ni.

India Vice President 15-na a nihna chu August 10 hian a tawp dawn a ni. House member zawng zawngte chu mipuite rorelna chu zah zel turin a chah.

Prime minister Narendra Modi chuan thlahna thu sawiin, Naidu chuan politics chawlhsan mah se, a tawnhriat lo neihte chu ram inkahhruaina atana thil pawimawh tak a la ni chhunzawm zel dawn a ni, a ti. House-a leader of opposition Mallikarjun Kharge pawhin thu sawiin, ngaihdan leh duhdan in ang lo tak nei ṭhin mah se, midangte nawrna nasa tak hnuaiah Naidu chuan a mawhphurhna ṭha taka a hlen zel thu sawiin, lawmthu a hrilh bawk a ni.