Sorkar laipuiin Covid-19 dona kawngah Delhi entawn turin duh
Sorkar laipui lama thuneitute chuan Covid-19 dona kawnga Delhi sorkar hmalakna chu an fak hle a, entawn turin state dangte an chah. "Hri leng laia thlabarna lo thleng hi kan hmelma a ni a, Delhi tih ang hian mipuiteah rinna chu kan nghat ngam tur a ni, hei vang hian Delhi pawh hri dona kawngah hma a sawn phah a ni," tiin thuneitu lam chuan an sawi.
India-a hri kai hluar mekna state-te hi Uttar Pradesh, Bihar and West Bengal anni a, anni bakah hian hri leng ṭan tirh aṭanga hri kai tamna state Maharashtra, Karnataka leh Tamil Nadu pawh an tel. Delhi chief minister Arvind Kejriwal chuan Nilaini khan June thla ai khan tun dinhmuna Delhi-a hri leng chuan ziaawm lam a pan mek thu a sawi a, hri kai thar punna leh he hri vanga thihna hi a tlem tawh thu a sawiin, hetiang dinhmun an thlen theihna chhan hi Covid-19 dona tura tihdan tur ṭha tak 'Delhi Model' an duan vang a nih thu a sawi.
Prime Minister Narendra Modi pawhin Kejriwal hmalakna hi a fak sak a, June 1 aṭang khan Covid-19 hri kai hi Delhi-ah an pung nasa chho ṭan a, June 30 chho vel aṭang khan zawimuangin an zia chho ve ṭan a ni. Sorkar laipui chuan Delhi-a hri kai hi an pun chak em avangin thla hlui khan July 15-ah chuan hri kai mi nuai 2.25 in an kai hman a ring a, mahse July 15 thleng khan Delhi-a hri kai hi mi nuai 1.34 an awm a ni.