Aarogya Setu app-a data access leh sharing titawp Data dah luh tawhte a him zui dawn em?

Sorkar laipuiin Covid-19 hripui a len hnua mobile application a siam leh, mipuite hmang vek tura a tih, Aarogya Setu chu hman chhunzawm a ni tawh lo a, he app-a data enna leh sharing protocol-te pawh tihtawp a ni ta. Hetih lai hian data dah luh tawhte chu a him zui zel dawn em tih zawhna a tam nghal hle.

Covid hri len zual lai khan sorkar laipui chuan he app hi a dah pawimawh hle a, mipuite chu hmang vek turin a ti a, mi vaibelchhe 10 chuangin an download hman a ni. Corona hri leng leh a kaihhnawih chungchangte inhriattirna atan hmangin, hri kai contact-te chhuina atan pawh hman zui a ni bawk. Thlawhtheihna leh rel hmanga zin turte tan phei chuan an hman ngei a ngai a, office leh institution dang kalna atan pawh, he app kaltlang hian phalna an nei thei a ni.

Mahse hri leng a ziaawm hnuah he app hman ṭangkaina pawh a tlahniam zel a, new agency-te chuan Aarogya Setu-a data access leh sharing protocol chu sorkarin a titawp tawh tih an sawi. He app kaltlang hian information a inpek zawm theih tawh lo.

Hetih lai hian he app hmangtuten an personal data an dah luh vek avangin, sorkarin Aarogya Setu app a tihtawp hian data dahkhawmte chu engtinge a tih zel dawn tih zawhna tam tak a awm nghal a ni. Mi tam tak chuan he app-a data an dah luhte chu eng angin nge venhim a nih dante an zawt bawk.

Internet Freedom Foundation (IFF) chuan RTI hmangin Aarogya Setu app chungchang hi a zawt chiang a, sorkarin a chhannaah app-a 'Data Access and Sharing Protocol' chu kumin May 10 aṭang khan tihtawp a nih thu hi a sawi a ni. He app siamtu, National Informatics Center (NIC) thupuangtu chuan app hi hman ṭangkai a nih tawh loh avangin tihtawp a ni, a ti.