Electricity-a thawkten Electricity Amendment Bill duh lohna lantir

Sorkar laipuiin Parliament Monsoon session neih meka Electricity (Amendment) Bill 2022 pharh a nih chu duh loin, nimin khan ram chhunga electricity employee leh power engineer maktaduai 2.7-ten lungawi lohna an lantir.

Retail power distribution lama inelna awm theihna tur, Electricity (Amendment) Bill 2022 hi union cabinet chuan a lo pawm tawh a ni. He dan siamṭhat tumnaah hian state electricity regulatory commission-te chu tariff an ennawn ṭhin phalsak an ni dawn bawk.

All India Power Engineers Federation (AIPEF) chuan dan siamṭhat tum danah hian area pakhatah distribution company pakhat aia tam hnenah license pek theih a ni dawn a, private company-te chu duhsak an nihin sorkar discom lam chuan nasa takin a tuar phah dawn a ni, an ti. He bill an duh lohna lantirin nimin khan an hna thawk turin nawrh an huaihawt a, prime minister Narendra Modi pawh he thilah hian inrawlh turin an ngen.

AIPEF chuan bill hi Parliament-ah hmanhmawh taka ngaihtuah rih lo a, Parliament standing committee chu zirchian tir leh phawt an duh thu an sawi. AIPEF chairman Shailendra Dubey chuan electricity chu constitution-ah pawh concurrent list a ni a, mahse sorkar laipui chuan state sorkarte ngaihdan pawh engmah a la lo a ni, a ti.

Hnathawktu maktaduai 2.7-ten lungawi lohna an lantir chungin, nimin khan Lok Sabha-ah union power minister RK Singh chuan Electricity (Amendment) Bill 2022 hi a pharh a ni. Eptu party hrang hrang, Congress, Left party, TMC leh DMK chuan he bill hi an sawisel a, bill hi ram danpui kalphung kalhin siam a ni a, sorkar laipui chuan state-te ngaihdan a ngaihpawimawh sak lo niin an puh. He bill hian power sector privatise a phalsak dawn a, induhsakna leh inthliarna nasa tak a siam thei dawn niin an sawi.