PM Modi leh President Trump inkawm
US tlawha zin, Prime Minister Narendra Modi leh US President Donald Trump-te chu Thawhlehni khan White House-ah an inkawm a, ram pahnihte inlaichinna chungchang bakah, firfiakte chetna do let chungchangte an sawi dun.
Ram hruaitu pahnihte hian Pakistan ram aṭanga firfiakte chetna thleng ṭhinte sawichhuakin, firfiakte beih letna kawngah thawhdun zel an tum thu an sawi. India leh US chuan Pakistan-a hmunpui nei, firfiak pawl Jaish-e-Mohamamd, Lashar-e-Toiba leh D-Company-te beih letna kawngah chak zawka thawhdun te an tiam bawk.
An inkawm zawh hnu hian hruaitu pahnihte chuan thuchhuah inṭawm an siam nghal a, an thuchhuahah hian 26/11-a Mumbai beitu firfiakte chungah rorelna dik tak thlentir ngei tura Pakistan an phut thu te an tarlang. White House-a Modi leh Trump-te inkawmnaah hian defence leh security chungchang te bakah, sumdawnna lama thawhdunna lamte pawh an sawidun a ni. Modi chuan President Trump leh a chhungte chu India rama zin turin a sawm a, a sawmna hi an lo pawm nia tarlan a ni bawk. Trump chuan kumin kumtawp lama India rama entrepeneurship summit neih turah hian US palaite chu a fanu, Ivanka Trump hoa an kal tur thu a sawi.
PM Modi hian Netherland a pan leh nghal a, Dutch Prime Minister Mark Rutte kawmin, Dutch company CEO-te pawh a hmu dawn a ni. Netherland lal, King Willem-Alexander leh Queen Maxima-te pawh a hmuh tur thu a sawi bawk.