GJM-in Gorkha accord hal an tum

Gorkha Janmukti Morcha (GJM)-te chuan Gorkhaland state hran phuta nawrh huaihawt an chhunzawm zel a, tripartite Gorkhaland Territorial Administration (GTA) accord copy pawh an hal dawn tih an sawi.

GTA hi kum 2011, July 18 khan sorkar laipui, West Bengal sorkar leh GJM-te’n hills area-a semi-autonomous body dahna tura an ziah a ni. Mahse GJM hian state hran an phut tak avangin GTA aṭang hian bang turin hill party-te chu an phut a, kar hmasa khan GTA-a GJM elected member 45-te chu an bang vek a ni.

Thawhṭanni zan khan mi tu tih hriat lohin Kalimpong-a West Bengal Cultural Development Board chairman Rajen Betiwal-a in an halsak a, a car pathum pawh suasam a ni bawk. Betiwal chuan a in hal a nih lai hian inchhungah a nupui leh a fapa an awm a, mahse an tlanchhuak hman niin a sawi.

GJM chuan West Bengal Chief Minister Mamata Banerjee-i chuan Morcha hmalakna tihchaklohna atan leh lo danna tur hmanrua atan development board 15 dinah an puh.

GJM hruaitute chuan state hran ngiata an nawrna chu chak zawka kalpui zel an tum thu leh, a ṭul a nih chuan Telangana-style movement ang kha kalpui an tum tih an sawi. Telangana state hran phut a nih lai hian an thil phut nawrna atan hian mi 15 an inhalhlum a, tiamchin awm loa chaw nghei an kalpui bawk. Kum 2014, June thla khan Andhra Pradesh aṭangin Telangana state hran hi siam a ni ta a ni.

Prakash Gurung, GJYM president chuan state leh sorkar laipuiin boruak ṭha tak hnuaia thil an nawr mek chu an ngaihsak lo a nih chuan, state hran phuta tiam chin awmloa chaw nghei leh mahni inhalhlumte pawh an tih mai ala ngai ve dawn niin a sawi.