Nitish Kumar-a'n BJP thawhpuina a titawp ; CM aṭanga banna a theh lut

Bihar chief minister, Janata Dal (United) hruaitu Nitish Kumar chuan ṭangrual sorkar an siampui, BJP nena an thawhdunna titawpin, nimin tlai khan Governor hnenah CM a nihna aṭanga banna a thehlut.

Thutlukna a siam hmain Nitish Kumar hian an party MLA leh MLC-te chu a chenna inah meeting a neihpui hmasa a ni.

Eptu party, Rashtirya Janata Dal (RJD), Congress leh Left party-te chuan Nitish Kumar leh JD(U) thlawpin sorkar thar siam an remtih thu an sawi nghal.

Nitish Kumar hian union home minister Amit Shah chu JD(U) tihphel tumin hma a la niin a puh a, hei vang hian ṭangrual sorkar an siampui BJP nen an inkar hi a ṭha lo chho hle a ni. Nitish Kumar hian a party hruaitu hlui, RCP Singh chu mawhphurtu zingah puhin, Amit Shah tana thawkah a puh. An party-in eirukna nasa taka inhamhnawiha an puh avangin RCP Singh hian kar liam ta hian JDU hi a lo chhuahsan tawh nghe nghe a ni.

JD(U) leh BJP thawhdun hnuah, kum 2017 khan union cabinet-ah JD(U) aṭangin RCP hi dah a ni a, mahse CM Nitish Kumar hi sorkar laipuiah cabinet post pakhat chauh pek an nih avangin a lungawi lo hle.

RCP Singh hian Amit Shah chuan amah chauh chu cabinet-ah JD(U) aiawh tlak niin a hrilh tih a sawi a, hei hian JD(U) chhungah BJP leh Amit Shah laka lungawi lohna a tilian zual bawk. Hei bakah hian Agnipath scheme, caste census, population law leh loudspeaker khap chungchangah party pahnihte an inlungrual lo bawk a ni.

Nitish Kumar hian Amit Shah chet dan chu Maharashtra-a BJP chet dan anga chet tumah a puh a. Maharashtra-ah hian Shiv Sena party chhungah BJP-in buaina an siam a, chief minister aṭanga Uddhav Thackeray ban a ngaih phah bakah Shiv Sena MLA hel hotu Eknath Shinde-a'n BJP thawhpui sorkar thar a siam a, hetiang hi Bihar-a thlentir tumah BJP chu puhin thawh dunna a titawp ta a ni

Bihar assembly-a party mala seat ngah ber, RJD chuan nimin khan meeting nei nghalin,state chhunga politics dinhmun an sawiho. Party hruaitu, kum 32 mi Tejashwi Yadav chuan Nitish Kumar an thlawp tur thu hi puangin, CM-in banna thehlut tura Governor a hmuhnaah pawh a ṭawiawm nghal bawk.

Kumar leh Yadav-te hian chanvo insem dan turah pawh inremna an siam fel tawh nia sawiin, sorkar thar siam turah Nitish Kumar hi CM niin, Yadav hi Deputy CM a ni dawn a, minister chu Nitish Kumar duhdan anga ruat niin, Speaker hi RJD lama mi ruat a ni thung ang.