Chinese smartphone Rs 12,000 hnuai lam khap tum

Sorkar laipui chuan Chinese smartphone, Rs 12,000 man hnuai lam chu India rama hralh chhuah khap a tum. Hei hi ram chhunga smartphone siamtute chawilar a tumna nia sawi a ni.

Hemi chungchanga thutlukna hi siam la ni lo mah se, sorkar chuan Chinese smartphone man tlawmte khap dan tur hi a ngaihtuah mek nia sawi a ni a, official thuchhuah engmah a la awm lo.

Counterpoint research tarlan danin, kumin June thla hmalam thla thum chhung khan India rama smartphone, Rs 12,000 man hnuai lam hralhchhuah zinga 80% chu China aṭanga thawn luh a ni.

Smartphone company-te bakah Chinese apps-te pawh sorkar laipui hian a bitum tel bawk. Kum 2020 khan Chinese apps za tel chu India ramah a lo khap tawh a, heng zingah hian apps hman lar TikTok leh Pubg Mobile te pawh an tel. Tun hnaiah sorkar laipui chuan Google leh Apple hnenah Battlegrounds Mobile India (BGMI) app, PUBG Mobile Indian version chu Play store leh Apple App store aṭanga la thla turin a lo hrilh tawh bawk. India ramah BGMI mobile game hi download theih a ni tawh lo a, sorkar leh game developer-te block a nihna chhan hi an sawi lang lo.