Maha CM-in a cabinet tilian, minister atan mi 18 lalut

Maharashtra chief minister Eknath Shinde chuan a cabinet tilianin, nimin khan MLA 18 chu minister atan lakluh an ni.

Minister atana lakluh zinga pariatte hi Uddhav Thackeray kaihhruai sorkar hmasaa Shiv Sena aṭanga minister lo ni tawhte an ni a, an ni bakah Sena MLA hel zinga pakhat, Tanaji Swanat chu cabinet-ah dah tel a ni bawk. BJP MLA pakua chu minister atan lakluh tel an ni bawk a, an zingah hain state BJP president Chandrakant Patil pawh a tel.

Governor Bhagat Singh Koshyari chuan minister tharte hi Raj Bhavan-ah rinawmna thu tiamtirin a lalut.

Shiv Sena hruaitu, Uddhav Thackeray kaihhruai ṭangrual sorkar, Maha Vikas Aghadi lakah Eknath Shinde hoin Shiv Sena MLA tam zawk an hel a, hei vang hian Thackeray pawh CM a nihna aṭangin a ban phah a ni. Hemi hnu hian Eknath Shinde kaihhruai Shiv Sena MLA hel leh BJP chuan sorkar thar an siam a, chief minister atan Shinde leh deputy chief minister atan BJP hruaitu Devendra Fadnavis-te chu lakluh an ni. CM leh Dy CM lakluh an nih aṭanga ni 40 ral hunah minister turte hi ruat fel an ni ta chauh a ni.

Maharashtra sorkarah hian minister 43 an awm thei a, mahse tunah hian CM leh Dy CM telin 20 chauh an la awm a, CM hian a ministry hi a tihlen belh leh thuai dawn niin an sawi. Minister lakluh tharte hi cabinet rank vek niin, hmeichhia an tel lo.