Ram pathum tlawha zin Prime Minister rawn haw

Prime Minister Narendra Modi chu ni li thanga ram pathum tlawha a zinkual hnuah nimin zing khan Delhi a rawn thleng.

PM Modi hi airport-ah External Affairs Minister Sushma Swaraj-i’n alo hmuak a ni.

Modi hian ni li thangin Portugal, US leh Netherlands a tlawh. Portugal-a a cham lai hian Portugal leh India thawhdunna tur thuthlung 11 ziah a ni a, heng zingah hian investment, science and technlogy, nanotechnology, space research, administrative reforms leh culture lama thawhdunna tur a tel. PM chuan ram pahnihte hian joint science and technolgy fund siam an remtih thu a sawi.

US-ah President Donald Trump nen an inkawm bawk a, ram pahnihten thawhdunna chak leh nghet zawk an neih theih dan turte an sawidun a ni. President Trump nen hian thuchhuah inṭawm siamin, Pakistan ram chu a ram chhunga firfiakte zalen taka an chet vel phal sak lo tur leh, ram dang beihna tur atana a ram leilung hman khap sak turin an ngen. PM Modi hian American company lina-a an CEO-20 te a kawm bawk a, Goods and Services Tax (GST), technology, India economy leh Digital India, Make in India, Skill Development, Demonetisation chungchangte an sawiho a ni.

Netherland a tlawhnaah Dutch Prime Minister Mark Rutte nen firfiaka chetna do letna kawnga thawhdun zel an tum thu thuchhuah siamin an tarlang bawk.