Vawiin aṭangin GST hmang ṭan dawn

Sorkar laipuiin ram puma inang tlanga chhiah lak dan thar tur a duan, Goods and Services Tax (GST) chu vawiin aṭangin ram pumah hman ṭan a ni dawn ta.

GST hawnna inkhawm hi nizan zanlai khan neih a ni a, Prime Minister Narendra Modi chuan kum sawmsarih chuang zet lo hman tawh, state leh central-in chhiah an dan lak hrang hrang thlakna tur GST hi nizan zanlai khan Parliament-a Central Hall-ah a hawng a ni. He hunah hian Parliament member-te bakah sawm bikte nen palai 1,000 vel an tel a ni.

Midnight session neihna, Central Hall hi carpet leh sound system thar nena thuam ṭhat a ni. Tun hmain midnight session hi ṭum thum neih a lo ni tawh. Heng hunte hi India zalenna lawmna puala neih a ni a, Congress chuan GST puala midnight session buatsaih hi 1947-a India-in zalenna a hmuh zahlohna chi khat nia a ngaih thu leh, Prime Minister Modi-a kaihhruai sorkarin mahni intihlarna hmanrua atana a buatsaih niin an sawi a, hei vang hian he session hi a boycott a, eptu party dang eng emaw zat an tel lo bawk.

Midnight session hi zan dar 11 aṭangin ṭan a ni a, zan dar 12-ah chiah GST hman ṭan ani ta tih entirna atan dar vuah rik a ni.

Union finance minister Arun Jailtey-a chuan Congress party chu rilru zim tak puah a puh a, mahse an ngaihdan chuan ram hmasawnna tur chu a tihdin phah dawn lo tih sawiin hmalam an pan zel tur thu a sawi. GST puala midnight session buatsaih chu inthehlar an tumna a ni lo tih sawiin, special session neih chungchangah hian President leh Vice-President te pawh an biakrawn thu a sawi.

Sorkar laipui chuan GST hawnna inkhawma tel tur hian Parliament member, state chief minister leh finance minister-te a sawm vek a ni.