August 5-ah vice pre­sident thlang dawn

Election Commission chuan August 5-ah Vice President thar tur thlan a ni dawn tih a puang.

Vice president ṭanglai, Hamid Ansari chu August 10-ah a term a zo dawn a ni. Chief Election Commissioner Nasim Zaidi chuan vice-president thlanna tur atana notification hi July 4 hian tihchhuah a ni dawn a, July 18 thleng nomination thehluh theih a ni ang. Nomination thehluh hi July 19-ah endik a ni ang a, July 21 thleng inhnukdawk duh tan hun hawn a ni ang.

Vice President thar thlanna hi August 5, chawhma dar 10 aṭanga tlai dar 5 thleng hawn a ni ang a, hemi ni vek hian result puan nghal a ni ang. Vice President hi Lok Sabha leh Rajya Sabha MP 790-te’n an thlang dawn a ni. EC chuan vice president thlanna neih turah hian Rajya Sabha Secretary-General Shumsher Sheriff chu returning officer atan a ruat a, Rajya Sabha secretariat officer zing aṭangin ARO ruat an ni bawk ang. Zaidi chuan Lok Sabha leh Rajya Sabha member-te’n vote an thlakna tur atan hian pen hran bik ruahman a ni dawn a, member-te hian he pen ruahman lo chu an mahni pen emaw, pen dang pawh an hman phal a ni dawn lo tih a sawi.