PM-in bawng humhalh hming chhala inthahna thleng duh lo

Prime Minister Narendra Modi chuan tunhnaia bawng humhalh hming chhala inthahna leh kut inthlakna thleng ṭhin chu a duh loh thu a sawi a, hetiang thil thleng hi pawm theih a ni lo, a ti.

Nimina Ahmedabad-a thu a sawinaah, PM chuan mi tumahin ama duh angin dan a lekkawh tur a ni lo, a ti. PM Modi chuan bawng humhalh chu tihtur a ni a, Mahatma Gandhi leh Achary-te pawhin bawng humhalh chungchang hi nasa takin an lo sawi tawh a ni, a ti. Hemi rual hian bawng humhalh chhuanlama hmanga midangte kutthlak leh thihna hial thlentir chu Gandhi pawhin a pawm thei dawn lo a ni, tiin a sawi.

Modi chuan, “Tharum thawhna thlen duh lotu ram kan ni a, Mahatma Gandhi chenna ram kan ni. Hei hi kan hriatreng a ngai a ni. Tharum thawhna hian hmun a chang tur a ni lo a, tharum hmangin eng buaina mah chinfel theih a ni ngai lo” tiin, Mahatma Gandh-a’n a duhthusam ram a lo suangtuah ang chu din turin mipuite a ngen.