Darkar 24 chhungin Covid-19 vangin mi 67 thi

Union health ministry in a tarlan danin, Nilaini khan India ramah coronavirus vangin mi 67 an thi a, he hri vanga thi hi mi 1,074 an tling tawh a ni. 

India ramah Covid-19 kai zat hi 23,651 an tling tawh a, hri kai zinga 8,324 chu enkawl dam an ni tawh. 

Hri leng vanga sorkar laipuiin rampuma lockdown a puan avangin mi tam tak an tangkhang mek. Mahse ministry of home affairs chuan kaihhruaina thar tichhuakin; hmun danga hnathawka inhlawh, zirlai leh khualzin tangkhang mekte chu he hri hi an kai lo emaw, a symptom emaw an neih loh chuan an state lamah haw phalsak an ni tawh tih a sawi. 

Tangkhang mekte hruai hawna tur hian an awmna state leh an tan mekna state-te inbiain an ruahman thei tih ministry chuan a sawi a, hemi rual hian hruai haw an ni hunah an inah emaw, sorkarin an awmna tur a ruahmanah emawh khung hran nghal tura tih an ni thung. 

Rel leh thlawhtheihnate an la service loh avangin, tangkhangte hi bus hmanga hruai haw tur an ni a, bus-te pawh hi damdawi hmanga kah thianghlim zel tur niin, bus chhungah pawh ṭhut tlantir loin, social distancing dan hman a ni ang.