India Vice President 14-na atan Jagdeep Dhankhar lalut

Jagdeep Dhankhar chu nimin khan India Vice President 14-na atan rinawmna thu tiam tira lakluh a ni.

President Droupadi Murmu chuan kum 71 mi, Dhankhar hi Rashtrapati Bhavan-ah thu tiam tir a, Dhankhar hian Hindi-in a tiam a ni.

Vice President thar lakluh inkhawmah hian prime minister Narendra Modi, vice president kalchhuak M Venkaiah Naidu, president Ram Nath Kovind, vice president hlui M Hamid Ansari leh union minister - Rajnath Singh, Amit Shah, Nirmala Sitharaman, Nitin Gadkari bakah mi pawimawh dangte an tel.

Dhankhar hian nimin zing khan Raj Ghat tlawh hmasain, Mahatma Gandhi zahna a hlan.

Kum 1951, May 18-ah Dhankhar hi Rajasthan-a Jhunjhunu district-a Khitana khuaah a piang a, an khuaah primary school kalin, a hnuah Sainik School, Chittorgarh-ah a zir zawm a ni. Sainik School a chhuah hnuah Jaipur-a Maharaja College aṭangin B.Sc(Physics) a zo a ni. Janata Dal party aṭangin politics bul a ṭan chho a, kum 1989 khan Lok Sabha inthlanah thlan tlin a ni. Congress hruaitu PV Narasimha Rao a prime minister lai khan Congress-ah a lut a, kum 2008 khan BJP-ah a zawm leh a ni. Kum 2019-ah West Bengal Governor-ah ruat a ni a, Vice President thlan turah BJP kaihhruai NDA chuan candidate atan a ruat a, kar liamta Inrinni khan thlan tlin a ni.

Party hrang hrang hruaitute nena inpawhna ṭha tak nei nia sawi a ni a, hei hi Rajya Sabha rorel inkhawm a kaihhruaina turah pawh a ṭangkaipui hle rin a ni.

Prime minister Narendra Modi chuan Dhakhar hi Constitution hrechiang, legislative affairs lama hriatna zau tak nei a ni tih sawiin, Rajya Sabha chairman ṭha tak leh, rorel inkhawm pawh ram hmasawnna tura kaihhruai thiam tak a nih ngei a rin thu a lo sawi tawh.

Parliament in hnih, Rajya Sabha leh Lok Sabha-a presiding officer, Jagdeep Dhankhar leh Om Birla-te hi Congress sorkarna, Rajasthan state mi ve ve an ni.