CJI-in court-ah face mask vuah vek turin lawyer-te hrilh

Chief justice of India (CJI) N V Raman chuan staff leh judge zingah Covid-19 hri kai an awm zel avangin lawyer-te chu courtroom-ah face mask vuah vek turin nimin khan a hrilh.

Nimina court rorelna ṭan dawnin CJI chuan mask hmang vek tur hian a ngen a, an staff tam zawkin Covid hri an kai thu a sawi a ni.

Tun hnaiah Delhi-a Covid hri kai hi an pung chho leh hle a, ni 10 kal ta chhungin hri kai hi a let li zetin a pung hman a ni. Nilaini khan Delhi-a hri kai thar hi 2,146 an awm a, ni 180 chhunga ni khata hri an tam ber ni a ni a, daily positivity rate hi 17.83% a tling leh tawh a ni. Tun thla chhungin hripui vanga thi hi mi 40 an awm leh tawh bawk.

Hri kai an pun chhoh leh vangin Delhi sorkar pawhin punkhawmna hmunahte face mask vuah vek tura thupek a tichhuak thar leh a, face mask vuah lo chu Rs 500 zel chawitir an ni ang.