Congress-in Delhi-ah 'Mehangai Chaupals' buatsaih dawn

Congress party chuan Delhi khawpuiah August 17-23 chhung hian 'Mehangai Chaupal', ram chhunga thil man sang zel chungchang sawihona a buatsaih dawn a, a kharna atan mega rally neih an tum bawk.

Party general secretary Jairam Ramesh chuan thuchhuah siamin, 'Meghangai Chaupal' hi mandi, retail market leh assembly constituency tin huam chhunga hmun hrang hrangah buatsaih a ni dawn tih a sawi. Sawihona hun an hman zawhah, August 28 hian Ramilla Ground-ah rally puitham tak buatsaihin, party senior leader-ten thu an sawi dawn a ni, a ti.

Ramesh chuan sorkar laipui anti-people policy avanga an party-in August 5-a ram pum huap nawrh an buatsaih chu mipui pawhin an thlawp ṭha hle niin a sawi. Congress party chuan ram chhunga thil man sang chak zel leh hnathawh nei lo zat pung zel chu duh lohan an la lantir chhunzawm zel dawn tih a sawi bawk.

Prime minister Narendra Modi kaihhruai sorkarin ram economy a enkawl thiam loh avangin mipuite chuan an tuar nasa tawh hle a ni tiin, sorkar laipui thil tih dik lohte chu Congress party chuan a pholang zel dawn a ni, tiin Ramesh chuan a sawi.