US-in India puih nan USD mtd 3 pe dawn

United States (US) sorkar chuan India rama Covid-19 dona kawnga  hma lakna puihna turin  US Agency for International Development (USAID) kal­tlangin US dollar maktaduai 3 a pe dawn tih a sawi.

April 6 khan USAID chuan hri dona turin US dollar mtd 2.9 chu India pek a nih tur thu a lo tarlang tawh a ni. India rama US Ambassador, Kenneth Juster chuan hemi hnua a dang pek belh an nih leh tur thu hi a sawi a ni.

Juster chuan hri donna kawnga US-in India a pui thei chu a lawm hle a, ram pahnihten inṭhianṭhatna leh inlaichinna ṭha tak an nei tih a hriat theih a ni, a ti. 

USAID hian Partnerships for Affordable Healthcare Access and Longevity (PAHAL) project-ah pawisa hi a pe dawn a, PAHAL project kaltlang hian India-a National Health Authority-te chu a ṭanpui ṭhin a ni. PAHAL project hian India-a mirethei te ṭanpui hna leh hriselna lama hmasawnna hna a thawk ṭhin. 

USAID-in India hri dona kawnga pawisa a pek zat tling­khawm hi US dollar mtd 5.9 a ni.