Salahuddin-a’n India ram a beih thu a puang

US sorkarin global terrorist-a a puan, Hizbul Mujahideen hotu Syed Salahuddin chuan India ram chhungah pawikhawihna a thlen ṭhin ngei thu a puang. Salahuddin hian Pakistan TV channel-a thu a sawinaah hei hi a sawichhuak a ni.

Hizbul Mujahideen hotu chuan an pawl chuan India ramah pawikhawihna an thlen ngei tih sawiin, global terrorist-a a puan avangin US President Donald Trump-a kaihhruai sorkar chu a mawl hle a ni, a ti bawk. Firfiak ni loin, zalenna sualtu a nih thu a sawi bawk.

Salahuddin chuan, “India aṭanga Kashmir kan lakchhuah hma chuan he inbeihna hi kan tawpsan dawn lo”, a ti. India ramah thlawptu ṭahhem tak an nei tih a sawi bawk. Hizbul hotupa hian nikuma Indian security force-te’n Hizbul Mujahideen commander Burhan Wani an kahhlum avang khan tualchhung buaina nasa tak a chhuah phah nia sawiin, Kashmir Valley chu India sipai thlanmualah an chantir tur thu alo sawi tawh a ni.

Kar kaltaa Prime Minister Narendra Modi-a US-a a zin lai khan, US State Department chuan Salahuddin hi ‘Specially Designated Global Terrorist’ ah a lo puang tawh a ni. US-in global terrorist-a a puante hi US security dinhmun tiderthawng zawnga firfiaka chetna thlen thei, UN economy leh foreign policy dinhmun tana mi hlauhawm nia a ngaihte an ni.

US-in Salahuddin-a global terrorist-a a puang hi Pakistan chuan a sawisel a, Pakistan Foreign Ministry thupuangtu chuan Kashmir mite dikna chanvo humhalhna tura beitu firfiak anga puan chu thil dik lo niin a sawi.