SC-in Madras HC thupek a dansak
Madras High Court-in Tamil Nadu sorkar hnena khawkheng tuartu loneitute loan ba ngaihdam sak tura hriattirna a pek chu Supreme Court-in a dan sak.
Tamil Nadu-a loneitute chuan New Delhi-a Jantar Mantar-ah an loan bate ngaihdam sak phutin ni 23 chhung nawrh an lo huaihawt tawh a ni. Hei vang hian Apritl thla khan Madras High Court chuan loneitute dinhmun hi a ngaihtuah a, agricultural loan ba te ngaidam turin Tamil Nadu sorkar hi a hrilh a ni. Madras HC-a Madurai bench chuan cooperative society leh bank-te chu loneitute loan ba neihte ngaidam a, ṭhing zui lo turin a ti.
High Court thupek chhuah chungchang avang hian Tamil Nadu sorkar chuan Supreme Court-ah petition a thehlut nghal a ni. High Court chuan state sorkar sum dinhmun a ṭha lo hle tih a hriatpui thu leh, hun harsa tak a hmachhawn mekah sorkar laipui chu Tamil Nadu sorkar pui tura a chetchhuah a ngaih thu a sawi bawk.
July thla khan state sorkar chuan marginal leh small farmer-te loan ba chu a lo ngaihdam sak tawh a, ram zau zawk nei loneitute chu an ba ṭhenkhat a ngaihdam sak bawk. Mahse high court chuan ram an neih zau leh zau loh lam ngaihtuah loin, loneitute zawng zawng loan ba chu ngaihdam sak turin a ti thung a ni.
High Court thupek anga loneitute loan ba zawng zawng ngaihdam a nih chuan state sorkarin a sum chawi belh tur chu cheng vaibelchhe 5,780 aṭangin cheng vaibelchhe 7769.33-ah a kai chho dawn a, loneitu nuai thum velin an chhawr thei dawn thung a ni.