Tamil Nadu Assembly aṭangin DMK memberte chhuak tau

Tamil Nadu Assembly session neih mekah, DMK member-te chuan Tamil Nadu minister leh official-te gutkha hralhchhuah a nih theih nan thamna an la nia sawi chungchang sawichhuah an tum chu Speaker P Dhanapal-a’n a remti lo a, nimin khan eptu member-te hi House aṭangin an chhuak tau.

Tamil Nadu-ah hian gutkha hi hralhchhuah khap a ni a, mahse nikum khan gutkha siamtute chuan an thil siam hi an hralhchhuah theih nan minister leh official ṭhenkhat hnenah thamna an pe nia sawi a ni. DMK Deputy Leader Durai Murugan chuan hemi chungchang sawi hi Speaker hnenah a dil a, mahse speaker chuan sawiho a nih tawh thu leh, Chief Minister K Palaniswami pawhin he thil hi chhui mek a nih thu pawh a lo sawi tawh a ni tiin, phalna a pe duh lo a ni.

Kar hmasa khan DMK hian hemi chungchang hi an sawichhuak tawh a, CM chuan Vigilance and Anti-Corruption branch-in an chhui mek tih a sawi. DMK hotu Stalin chuan CBI chhuitir an phut bakah minister hi bang turin a phut a ni. Mahse minister hi a hming erawh puanzar a ni lo.