I-Day lawmna atana inbuatsaihna ngawrh takin kalpui

India zalenna champha vawi 75 lawmna tur atana inbuatsaihna chu ram chhung hmun hrang hrangah ngawrh taka neih mek a ni.

Independence Day lawmna pui ber neihna tur, Delhi-a Red Fort-ah pawh inbuatsaihna uluk taka neih a ni a, Red Fort pawh India flag rawngin chei a ni tawh. Venhimna lam pawh khauh taka kalpui ani dawn a, Independence Day-ah hian venhim hna thawk turin police 10,000 chuang dah an ni ang. CCTV camera pawh Red Fort compound-ah hian 1,000 vel dah a ni bawk ang.

Red Fort leh a chhehvel, km 5 bial chu no-kite flying zone-ah puan a ni a, hemi huam chhunga balloon leh lehkhachaih lo chhuah an awm palh thulha lo dang turin kite flier 400 chuang chu Red Fort leh a bul velah dah an ni ang. Kum 2017-a Independence Day lawm nia prime minister Narendra Modi-a'n thu a sawi laiin, podium hnuaiah lehkhachaih a tla a ni. Hetiang thil hi a thlen tawh lohna turin police-te chuan hma an la a ni.

Delhi police-te chuan khawpui chhung pawh uluk takin an enfiah mek a, hotel, guest house, parking lot leh restaurant-te bakah, in luaha awm leh awmpuite pawh an endik kual mek bawk.

High-specification camera-te hi City police-a north, central leh New Delhi district unit-ten an vuah dawn a, heng hmang hian Red Fort pana VVIP kalkawng pawh an vil tel ang. Internet Protocol (IP)-based camera-te hi face detection, movement detection, tripwire, audio detection leh thil dang hmanga thuam an ni dawn a, full HD 1080P live view a theih dawn bawk a ni.

Delhi Police-ten live cartridge 2,000 chuang an man
Delhi Police-te chuan nimin khan live cartridge 2,251 an man. A kengtu mi paruk an man tel bawk.

Eastern Range-a Assistant Commissioner of Police Vikramjit Singh chuan an thil man hi Uttar Pradesh-a Lucknow-a supply an tum niin a sawi a, he thilah hian firfiakte an inhnamhnawih em tih pawh chhui nghal a ni tih a sawi.

Har Ghar Tiranga : DoP-in national flag vbc 1 chuang hralh tawh
Sorkar laipuiin Independence Day lawmna peng pakhata in tina India national flag tarna tur programme a siam, Har Ghar Tiranga campaign chu state leh UT tinah kalpui mek a ni bawk.

August 13-15 chhung hian sorkar laipui chuan chenna in, sorkar leh private office leh institution hrang hrangah national flag hi tar turin a ngen a ni.

Department of Posts (DoP) chuan ram chhunga post office nuai 1.5 a neih aṭangin, national flag hi ni 10 chhungin vaibelchhe khat chuang a hralh chhuak tawh. Department chuan flag hi pakhat Rs 25 in a hralh a ni. Online pawha chah theih niin, ePost Office facility kaltlangin online-in flag hi nuai 1.75 lei a ni bawk.