Israel-ah PM Modi a zin
Prime Minister Narendra Modi chu ni thum cham turin nimin khan Israel-ah a zin a, India ram prime minister zinga Israel tlawha zin hmasa ber a ni. A cham chhung hian ram pahnih thawhdunna tur inremna thuthlung eng emaw zat an ziah beisei a ni.
PM Modi hian nizan dar 6.30 khan Israel hi a thleng a, airport aṭangin Moshvv Mishmar Hashiva a pan nghal a, Israel rama flower farm lar ber zinga mi Dan Farm a tlawh a ni. Farm-ah hian Agriculture Ministry-in Israel agricultural technology thar ber ber an entir te a thlir a, an thil entir zingah hian irrigation multicopter drone leh thermal camera te a tel.
Modi hian Jerusalem-a Yad Vashem Holocaust Museum a tlawh bawk a, Israel Prime Minister Benjamin Netanyahu-a’n a ṭawiawm. He hmunah hian pangpar dahin, Children’s Memorial a tlawh bawk a, guest book-ah a hming a ziak a ni.
Israel PM Netanyahu chuan PM chenna inah Modi tan hian zanriah a buatsaih sak a, hetih lai hian PM zuitu India palaite tan Israel Foreign Ministry director general leh acting national security advisor-te chuan King David Hotel-ah zanriah an lo buatsaih sak ve thung.
Vawiin hian Modi hian Israel President Reuven Rivlin a hmu dawn a, Israel eptu hruaitu Isaac Herzog nen pawh meeting an nei ang. Meeting zawh hnu hian Israel Museum-a tlawh leh bawk ang.
PM hian a cham chhungin 26/11-a firfiakten Mumbai-a Nariman House an beih ṭuma Juda nupa an kahhlum takte fapa, kum 10 mi Moshe Holtzberg pawh a hmu dawn a ni. He hunah hian Moshe-a wmtu, India mi Sanda Samuel pawh a tel ve ang.
Naktukah PM hian Israel hmarlama lawngchawlh hmun, Haifa a tlawh ang a, Indopui I hunlaia Haifa-a India sipai thi te hriatrengna hmun siamah pangpar a dah dawn a ni. Golan Heights-a United Nations Disengagement Observer Force-te leh, India sipai 20-te pawh a hmu dawn a ni.