Darjeeling-ah rally huaihawt

Gorkha Janmukti Morcha (GJM)-te’n West Bengal aṭanga Gorkhaland state hran pek phuta Darjeeling district-a nawrh an huaihawt chhunzawm nan Thawhṭanni khan district chhung hmun hrang hrangah rally huaihawt a ni.

GJM-te nawrh huaihawt avang hian Darjeeling district-ah ni 17 chhung internet service tihtawp a lo ni tawh a, ni riat dang tihtawp chhunzawm tura tih a ni. Hill district-ah hian dawr, hotel, school leh college-te khar chhunzawm a la ni. GJM kaihhruaia nawrh huaihawt­ah hian tharum thawhna te chhuakin, buaina chhuak avang hian mi pahnihin nunna an chan tawh a ni.

Morch General Secretary Roshan Giri chuan thil phut pakhat chiah an nei a, chu chu Gorkhaland state din a ni tih sawiin, an inhnukhniam dawn lo tih a sawi. State hran pek phuta nawrh an huaihawt mekah sor­kawr laipui chu inrawlh a, awmze neia hma la tura an duh thu a sawi. Bengal-ah chuan Gorkha mite chu an him tawh lo a ni ti sawiin, hei vang hian Gorkhaland state hran an phut tih a sawi. Nawrh huaihawt chhunga sorkar office leh motor halnaah GJM chuan inhnamhnawihna a neih loh thu a sawi bawk.