Rahul-a’n loneitute puala rally buatsaih telpui dawn

Congress vice president Rahul Gandhi chu ram pawn lamah ni 18 chawlh a hman hnuah kar kalta Inrinni khan a rawn haw a, BJP rorelna state hrang hranga loneitute puala rally buatsaih tur a telpui dawn.

Congress party chuan BJP rorelna state, Gujarat, Rajasthan, Madhya Pradesh, Chhattisgarh leh Mahashtra-ahte loneitute pualin rally huaihawt an tum a ni. Madhya Pradesh-ah chuan ni 10 awh tur Kisan Yatra neih ṭan a ni tawh a, July 10 hian a zo ang. Maharashtra-ah Congress hian July 9-ah state pum huapin loneitute pualin nawrh huaihawt an tum a, Uttar Pradesh-ah pawh party hruaitu Raj Babbar chuan thingtlang khaw hrang hrangah meeting buatsaihin loneitute harsatna tawh mekte a ngaihthlak sak bawk ang. BJP rorelna state bakah, Tamil Nadu-ah pawh loneitute puala rally hi huaihawt an tum bawk.