Company-te Sept 30 thleng hun pe

Sorkar laipui chuan company hrang hrangte chu Goods and Services Tax (GST) hman ṭan hmaa an thil siamte hralhchhuah a nih theih nan MRP siamṭhat chu sale price an print bula tarlanga an zawrh chhuah a phalsak.

Maximum Retail Price, MRP hi tax zawng zawng chhiar tel a nih hnua consumer hnena hralh chhuah theihna man sang ber a ni. Mahse GST thar hman a nih hnuah bungraw ṭhenkhatah tax rate hi a danglam a, hei vang hian MRP pawh hi a danglam phah dawn a ni.

July 1 aṭanga GST hman ṭan a nih tak avangin sumdawng tam takin harsatna an tawk a, GST hman hmaa an thil siam­chhuah hralh loh tam tak an la nei a ni. Hei vang hian sorkar chuan tax rate thar anga an MRP siam chu ennawn a, revised price tarlanna sticker chu an bel a phalsak a ni. Heng bungruaah hian MRP hlui leh, GST hman a nih tak hnua MRP thar lanna sticker chu tihlan ve ve a ngai dawn a ni.

October 1 aṭang chuan bungraw hralhchhuah turah hian GST hmanga siam, MRP pakhat chauh lantir a ni tawh ang. Food and Consumer Affairs Minister Ram Vilas Paswan chuan, GST hman ṭan hnua bung­raw hralhchhuaha revised MRP tarlang lo company-te chu an chungah action lak a nih tur thu a sawi. Minister chuan GST hman a nih aṭangin thil man tam tak a tlahniam a, hei hi consumer-te hrilhhriat ngei an ni thu a sawi. Hetihlai hian GST hman anih avanga bungraw stock zinga a man to phah turte chu a siamtu emaw, a lalutte emaw chuan a man danglam tak dan hi chanchinbu pahnih emaw, a aia tam emawhah vawi hnih tal advertisement an tichhuak bawk tur a ni.