Highway bula zu zawrh khap vangin UP-in sum hloh hnem

Supreme Court-in national leh state highway bulhnaia zu zawrh khapna thupek a tih­chhuah avangin Uttar Pradesh-ah chuan zur dawr tam tak khar a ni a, sorkarin zu aṭanga chhiah a lak ṭhin cheng vaibelchhe 5,000 vel a hloh a ni.

UP Excise Mi­nister Jai Pratap Singh chuan Supreme Cour thupek hian highway dung-a zu dawr siam 8,591 vel a nghawng a, dawr 2,000 te chu an insawnna tur tihfel a la ni lo a, dawr neitu 3,000 te chuan liquor licence chu sorkarah an thehlut niin a sawi.

Minister chuan kum 2016-17 fiscal year chhungah cheng vaibelchhe 5,00 an hlawh niin a sawi. Zu chhiah aṭanga sum hmuh tura beisei, cheng vaibelchhe 19,000 aṭangin excise department chuan cheng vaibelchhe 14,000 a hmu tih a sawi.

Supreme Court chuan nikum December 15 khan national leh state highway hnaivaia zu dawr siam leh, zu dawr a awm a ni tih lanna signboard tar khapna thupek a ti chhuak a ni. Kum­in March 31 khan court chuan thupek hi chhuah thar lehin, April 1 aṭangin highway aṭanga meter 500 china zu dawr siam leh hralh a khap a ni. A hnuah he thupek hi mi 20,000 aia tlem chenna bial atan chuan meter 220 chin­ah a tihniam leh a ni.