China-in Xi-Modi meeting neih tur a ṭhulh

Prime Minister Narendra Modi leh China President Xi Jinping-te’n Hamburg, Germany-a G20 Summit kar laka meeting neih an tum chu China chuan a ṭhulh a, hruaitu pahnihte meeting neih tur chu a boruakin a zir hrih lo niin a sawi.

Tunlai hian Sikkim ramri-ah China leh India sipaite inkar boruak a ṭha lo hle a, an inep na hle a ni. Ramri-a sipaite an inep laia ram hruaitu pahnihten meeting an lo neih chu a rem hrih lo niin, China Foreign Ministry official chuan a sawi.

Tun hnaiah ram pahnihte hi ramri chungchangah an innghirngho a, Line of Actual Control (LAC) paltlangah an inpuh tawn a ni. Ram pahnihte hian ramri depah sipai 3,000 vel ve ve an tir a, a ṭul huna che chhuak mai thei turin an inralring a ni. China sipaite hian tun thla tir lam aṭang khan Sikkim section-a India, Bhutan leh China-te inrina, Doklam-ah kawngpui a siam a, helai hi China chuan an ram chin niin a chhal a ni. China chuan a kawngpui siam mek tihtawp tumin India sipaite chuan ramri an kan niin a sawi. Doklam-a kawngpui siam mek hi China chuan a ram venhimna tur niin a sawi a, he kawngpuiah hian ralthuam tonne 40 vela rit phur thei light battle tank, artillery gun tank leh a dangte tlan thei tura ruahman a ni.

China hian kawngpui a siam mek tihtawp tura ramri kana India sipai kalte chu kir tura a tih hnuah an kir mai loh avanign Indian bunker-te a tihchhiatsak nia sawi a ni bawk. India leh China ramri hi km 3,488 vel zeta thui a ni a, international border-ah hian ram pahnihte hi an lo buai fo tawh a ni. PM Modi leh President Xi-te hi vawiin aṭanga tan tur, G29 summit hmang turin Hamburg, Germany-ah an kal a, tun ṭum hi G20 summit vawi sawmpahnihna tur a ni.