PM-in Haifa-a Indian sipai martarte thlan a tlawh

Israel rama cham mek, Prime Minister Narendra Modi chuan nimin khan Haifa a tlawh a, Indopui I hunlaia Indian sipai martarte thlan a tlawh a, zahna pangpar a dah.

Indopui I hunlai khan Ottoman Empire sipaite lak aṭanga Haifa venghim turin sipai tam takin an nunna an chan a, an zingah hian India sipaite pawh an tel a ni. Battle of Haifa hi kum 1918, September 23 khan neih a ni a, India sipai martarte hriatreng nan hian kumtinin Indian Army chuan Haifa Day hi an hmang a ni.

PM Modi hian Nilaini kha Israel rama India mi awmte hmaah thu sawiin, New Delhi, Mumbai leh Tel Aviv flight service tir a ni dawn tih a puang. Hei bakah Israel ramah Indian Cultural Centre din a nih tur thu a sawi bawk. Israel leh India hian US dollar maktaduai 40 hu India-Israel Industrial Research and Development(R&D) and Technical Innovation Fund dinna turin Memorandum of Understanding (MoU) an ziak a, he inremna hi Department of Science and Tecnology leh Israel-a National Technological Innovation Authority-te’n an ziak a ni. Ram pahnihte hian Indian Space Research Organisation (ISRO) leh Israel Space Agency (ISA) thawhdun an remti bawk.