Telangana sorkarin Dalit hnam tan university din dawn

Telangana sorkar chuan academic session thar aṭangin Hyderabad-ah Dalit hnam pualin university ṭha tak a din dawn. Hei hi state sorkarin hnam hnuaihnung leh rethei zawkt zirlaite tana a thlawna zirna pekna tur policy a siam kalpuina tur pakhat a ni. Dalit zirlaite puala university siam tura rawtna hi Telangana Social Welfare Residential Educational Institutions Society (TSWREIS) chuan siamin, hei hi state sorkar chuan a ngaihtuah mek a ni. TSWREIS hian Dalit zirlai, Class V aṭanga under graduate level thleng zirna, residential institution 268 a enkawl mek a ni.

TSWREIS secretary Dr R S Praveen Kumar chuan Dalit zirlaite puala university din chungchang hi Chief Minister K Chandrasekhar Rao an sawipui tawh a, ani pawhin ṭha a ti hle niin a sawi. Ruahmanna kalpui mek niin, harsatna dang a awm a nih loh chuan university hi 2018-19 academic year aṭanga ṭan a nih tur thu a sawi. University hi din a nih chuan ramchhunga Dalit zirlai puala university din hmasak ber a ni ang.