CBI-in Lalu leh a chhungte lakah thubuai thehlut
Central Bureau of Investigation (CBI) chuan Bihar chief minister hlui leh union railway minister hlui Lalu Prasad Yadav leh a nupui Rabri Devi bakah a fapa, Bihar Deputy Chief Minister Tejaswhi-te lakah thubuai a thehlut. Nimin khan Lalu leh a chhungte in hmun 12 an dap bawk.
Lalu Prasad Yadav hi railway minister a nih laia hotel siamna tur ram pekchhuah chungchanga dik lo taka thiltia puhna kaihhnawihah thubuai hi siamsak a ni. Private company hnena railways hotel siamna tur ram a pek danah thil fel lo a awm nia sawi a ni.
CBI chuan sumdawng Harsh Kocchar hnenah Puri leh Ranchi-a Railways tana hotel pahnih siamna tur atan kum 15 chhung ram pek a ni a, mahse a hnuah he ram hi Yadav-a nupui leh fapte hmingin dah zui a nih thu a sawi.
CBI chuan Indian Railway Catering and Tourism Corporation (IRCTC) hotu hlui, PK Goyal pawh dik lo taka hotel siamna tur ram pekchhuah chungchangah hian inhnamhnawiha puhin thubuai a siamsak bawk.
Lalu Yadav chuan thil dik lo engmah a ti lo niin a sawi a, Kochhar-a hnena Railways hotel siam phalna pek a nih dan chu langtlanga kalpui a nih thu leh, tender tihchhuahah a a chhangtu huai ber a nih vanga pek a nih thu a sawi.
CBI-in Patna-a 10, Circular Road-a a in an dap lai hian RJD hotu Lalu hi inah a awm lo a, ranchaw man tihchingpen thubuaiah Ranchi-ah CBI court-ah inlan turin a kal a ni.