WBengal-a buaina chhuahnaah politician kal khap

West Bengal-a tualchhung buaina chhuahna hmun, Basirhat khuaah political party hruaitute an kal khap a ni.

North 24 Parganas district -a Basirhat-ah hian rawl­thar pakhatin a Facebook-ah Prophet Mohammad sawi­chhiatna lam hawi thu a post avangin Muslim-te an lung­awi lo hle a, buaina hi a chhuak zui a ni. District chhung khaw dangah buaina hi a darh tawh a, Facebook-a thu post-tu pawh hi manin jail-ah dah luh ani tawh bawk.

BJP chuan Muslim mi 2,000 chuang chuan district chhunga Hindu chhungkaw eng emaw zat beiin, an chenna in te an halsak niin a sawi. He thil thlengah hian West Bengal Chief Minister, Trinamool Congress hotu Mamata Banerjee an dem thu sawiin, buaina siamtute thunun zo lo leh, an party-in Muslim te an thlawp tih a lang niin an sawi.

Hetih lai hian CM Banerjee chuan BJP leh RSS te chu tharum thawhna thleng chungchangah mawhphurtuah a puh thung a, an hruai­tute chuan buaina tipunlun zawngin thu an sawi fo niin a sawi. Tualchhung buaina chhuak chungchangah hian CM Banerjee leh Governor Kesari Nath pawh a inhauh phah a, thil awmdan hrilh tura Governor a biak chuan amah elsen leh hmusit takin a lo ṭawngkhum niin CM chuan a sawi.

Basrihat-a buaina chhuak vang hian political party hrang hrang hruaitute chuan tlawh an tum a, mahse boruak ṭha lo zawk a thlen venthawn thilah an kal khapsak an ni. Nimin zing khan police-te chuan Barsihat tlawh tuma kal Left party hruaitute chuan km 50 vela hlaah an lo dang. BJP leh Congress hruaitute pawhin kal an tum thu an sawi a, mahse Chief Minister Banerjee-i chuan kal lo tura ngenin, rorellai Trinamool Congress hotute pawh an kal loh tur thu a sawi a ni.