Akasa Air neitu Rakesh Jhunjhunwala a thi

Veteran stock market investor, India Warren Buffet tia sawi fo ṭhin, Rakesh Jhunjhunwala chu nimin zing khan kum 62 mi niin a thi.

Jhunjhunwala hi india rama airline thar ber, Akasa Air dintu zingah telin, he airline hi kar liam ta khan thlawhtheihna hi a service tir ve ṭan chiah a ni. Hungama Media and Apetech chairman a ni bawk a; Titan, Star Health, Tata Motors leh Metro Brands bakah company 30 chuangah investmetn lian tham tak a ti bawk.

Cardiac arrest a neih vangin nimin zing dar 6.45 khan Mumbai-a Breach Candy Hospital panpui a ni a, mahse damdawiin an thlen hian a nunna hi chhan hman a ni tawh lo. Hun rei vak lo liam taah khan he damdawiinah hian kal (kidney) lam ṭha lo avangin enkawl a lo ni tawh bawk.

Rakesh Jhunjhunwala hi nimin tlai khan Mumbai-ah vui nghal a ni.